Donnerstag, 28. März 2024

Anzeige

Mien Frust mit dän Rust

Gefeult mien Lebe lang befote ick mie mit dän Themo Rust.

Foto: dbvirago/stock.adobe.com

Van Friedrich-Wilhelm Graue ut Woterstrote  

Moin leibe plattdütsch Läser. Ein neiet Themo un garantiert ohne Corono.

Gefeult mien Lebe lang befote ick mie mit dän Themo Rust. Dat ick dor eis ober schrieben schöll, dor hat mie mien ehemolige Schaulfreund Manfred tau uppemuntert. Up dei Wiehnachtsfier bien TUS  meende hei: „Schrief doch eis wat ober dienen ärgsten Feind.“ Ick säh promt: „Ick häbbe keinen Feind! Bin froh, dat ick mit alle Lüe klorkome“. Mie kennt kuum einer bäter. Hei meende: „Du hast einen Feind, nämlich dän Rust. Du kämpfest doch dien Lebe lang gegen düssen Rust.“ Un dor hat hei recht.

Weil wie eine hannige Buerreie haen, lach et nohe, ole un kaputte Maschinen sülm tau reparieren. Un sau hat sick dat reparieren van ole Trecka rutebildet un ick bin dor bet van Doge bie bleben. Dei Substanz van einige ole Trecka was foken sau schlecht; man har sei eigentlich jo al uppegeben. Einege Blecke wöan wecherustet un mösten anneflicket wean. Bie einen Trecka stund dei Motor fuller Wota, dei Loger wöan Schrott un dei Kolben was fasterustet. Ick häbbe alles versocht, mol mit Chemie, mol mit sanfte Gewalt un jümmer wer Rustlöser. Et hat Joahre bruket, bet sick wat rögede. Dat besächte Objekt is miene aktuelle Baustehe, ein Lanz Bulldog.

Vör 3 Joahren bin ick dor mehe annefangen. Ick möchte dän erbärmligen Taustand un alle Reifen platt, nich mehr seien. Un ick wusste, dat wert nich einfach un bruket Utduur. Wenn ein Trecka 10 oder 15 Joahre buten stohen hat, denn hat dat schlimmste Folgen. Motor un Getriebe vuller Woter, dat kannste nich bruken.

Bie jeden olen Trecka, dei mie inne Finger komen is, was et mie jümmer wichtich ruttaufinnen, worumme man öhne uppegeben hat. Mol was hei ober dei Joahre unmodern worn, mol fählde dat Dack, oder dei Berufsbenossenschaft kann mit neie Upplogen, mol fählde eine Hydraulik oder Maihbalken. Foken haen sei einen schlimmen Taustand un woan achter dat Hus e stellt un et gaff ein neiet Modell.

Anzeige

 

Mit einige Treckafrünne häbbet wie Joahre lang esocht. Foken det Sönndoges morgens gung et up Treckajacht, wie wie et nennen. Wenn einer eis wer eine Adresse rutefunnen har, denn wollen wie dat nohgohen. Foken was dat Objekt ober nich tau kriegen. Sau lange Opa noch lebet, draff hei nich wech, hörde man foken. Was et doch foken dei erste Trecka, man häng dor ok anne. Mol sind wie up ein Objekt der Begirde e stött, däne haen sei mit kloren Keulwota achtert Hus e stellt, weil hei kaputt was. Dän taukomen Winter hat hei denn nich oberlebet un is kaputtefroan. Man har dän olen Trecka woll vergeten. Trotz schlimmster Schäden häbbet wie düsset Wrack e kofft, un use Ehrgeiz was et, öhne tauen Lopen tau kriegen. Bet et sau wiet was, togen Joahre innet Land.

Manche Oltimerdeilemesse un Treckahändler bet hen noh Holland mössten besocht wern. Intwüsken mit Internet is et einfacher worn, an Adressen tau komen, wer sick mit düssen rusterigen Themo befotet. Baukompressor un Sandstrohler worn anneschaffet, ümme dän Rust bietaukomen. Ick bin jümmer düchtich taufrehe, wenn dat blanke Isen un Blecke wer in Lanz blau oder in Deutz greun lackirt wöan.

Ein schönet Gefeul is et vör mie jümmer, wenn man dei fertigen repatierten Deile wer anschruben kann, un sau ein Trecka mit heile Reifen almählich wer komplett werd Ick kriege jedes mol Gosehut, wenn sau ein Monstrum noh Joahren Reparotur dei ersten Töne van sick gift un an tau puttgen fangt.

Intwüsken is et ok bie mie annekomen, dat Patino in Mode is. Dat heit, Technik okay un buten Rust. Rust konservieren, is nich miene Welt, ober ick kome dor mehe klor. Ober lest häbbe ick woll dän Bogen oberspannt. Jie kennt alle düsse rusterigen Katten Uhlen Müse un Spatzen innen Vörgorn. Wie häbbet dor ok einige Deko Objekte Et was mie jümmer ein Dorn inne Ogen. Un wie dei Dübel et woll, könn ick dat rusterige Veih nich mehr seien, häbbe dei Drotböste herekregen un dat rusterige Getier strolde bolle in bunte Farben. Miene Fraue woll et nich glöben, un dei Arbeitskollegen von öhr wollen sick nich wer innkriegen. Dei Frust mit dään Rust is bie mie woll düchtich utepräget.

Das könnte Sie auch interessieren